އެމްއީއޭ އިން ކަރަންޓް ސިސްޓަމްތައް އިންސްޕެކްޓް ކުރުމުގެ ޕްރޮގްރާމެއް ފަށައެވެ
މޯލްޑިވްސް އެނާޖީ އޮތޯރިޓީ (އެމްއީއޭ) އިން މޯލްޑިވްސްގައި ގާއިމްކޮށްފައިވާ ކަރަންޓް ނިޒާމުތައް ބަލައި ފާސްކުރުމުގެ ޕްރޮގްރާމެއް މިއަދު ފަށައިފި އެވެ. މި ޕްރޮގްރާމްގެ މަގުސަދަކީ އެމްއީއޭއިން ހިންގާ މިންގަނޑާއި ގަވާއިދުތަކާ އެއްގޮތަށް ކަރަންޓުގެ ނިޒާމުތައް ގެނައުމެވެ. މި ޕްރޮގްރާމްގެ ދަށުން ފުރަތަމަ އިންސްޕެކްޝަންތައް ކުރިއަށް ގެންގޮސްފައިވަނީ ކ.ގުޅީގައެވެ. އެމްއީއޭގެ ޓެކްނިކަލް ތަޖުރިބާކާރުންގެ ޓީމެއް މިއަދު ކ.ގުޅީއަށް ޒިޔާރަތްކޮށް ސްޓެލްކޯއިން ހިންގާ އިންޖީނުގެ އަދި ހަމައެހެންމެ އެ ޖަޒީރާގެ ބޯޓު ޔާޑަށް ކަރަންޓް ފޯރުކޮށްދިނުމަށް ގާއިމްކޮށްފައިވާ އިންޖީނުގެ ވެސް ވަނީ ބަލާފައެވެ. އެމްއީއޭ އިން ވަރަށް އަވަހަށް އިންސްޕެކްޝަން ރިޕޯޓް އެކުލަވާލައި، ބޯޓު ޔާޑް އިންޖީނުގެއިން ފާހަގަކުރެވޭ މައްސަލަތައް އިސްލާހު ކުރުމަށް ބޯޓު ޔާޑް އިންޖީނުގެ ހިންގާ ފަރާތަށް އެކަން އަންގާނެ އެވެ.